Skýrslur stjórnar öldungadeildar
Aðalfundur stjórnar öldungadeildar Lögfræðingafélagsins fyrir starfsárið 2011- 2012
Á aðalfundi í apríl 2011 voru kjörin ný í stjórn félagsins Ingimundur Sigfússon og Kristín Briem. Þau eiga því eftir ár af kjörtíma sínum. Fyrir í stjórn var Hrafn Bragason. Hann hefur einu sinni verið endurkosinn og er því ekki til endurkjörs. Í varastjórn voru kosin ný til tveggja ára Ragnhildur Bendediktsdóttir og Reinhold Kristjánsson og eiga því ár eftir af kjörtíma sínum. Fyrir í varastjórn var Guðrún Erlendsdóttir. Hún hefur einu sinni verið endurkosin og er því ekki til endurkjörs. Í öldungaráð voru kosin til eins árs Björn Friðfinnsson, Guðný Björnsdóttir, Hörður Einarsson og Þór Vilhjálmsson. Þau hafa einu sinni verið endurkosin og eru því ekki til endurkjörs. Til eins árs voru auk þess kjörin Auður Þorbergsdóttir og Jón Thors. Þau má hins vegar endurkjósa samkvæmt lögum félagsins.
Stjórnin hefur fundað nokkuð reglulega a.m.k. einu sinni í mánuði, stundum með varastjórn og/eða öldungaráði. Starfið hófst með skipulagningu og ferð til Vestmannaeyja í september. Stjórnin naut við skipulagningu ferðarinnar aðstoðar Kristjáns Torfasonar fyrrum sýslumanns þeirra Eyjamanna og Eyrúnar framkvæmdarstjóra. Að sögn þeirra sem þessa ferð fóru tókst hún með eindæmum vel. Eyjarnar skörtuðu sínu fegursta og heimamenn tóku ferðalöngum fagnandi.
Að venju boðaði stjórnin til fyrirlestrahalds yfir vetrarmánuðina. Í október flutti Pétur Kr. Hafstein fyrrum hæstaréttardómari sögulegt erindi um frávikningu sýslumanna, en erindi þetta byggðist á meistaraprófs ritgerð hans um þetta efni. Var erindið hið fróðlegasta. Stjórnin fékk Sigurð Líndal til að bregðast við erindi Péturs enda töldu stjórnarmenn sig ekki vel hæfa til að spyrja gáfulega um þetta efni. Í lok nóvember sagði Tómas H. Heiðar aðalsérfræðingur utanríkisráðuneitisins um alþjóðarétt okkur frá deilum um makríl, hval og hafsvæðið í kringum Ísland. Varpaði frásögn hans skýru ljósi á þessi miklu hagsmunamál okkar íslendinga. Í janúar ræddu Eiríkur Tómasson hæstaréttardómari og Ólafur Egilsson fyrrum ambassador um forsetaembættið en svo sem kunnugt er stefnir í grimman slag um embættið í höndfarandi kosningum. Í febrúar hélt öldungadeildin sameiginlegan fund með Lögfræðingafélaginu þar sem úttektarnefnd um störf lífeyrissjóðina í aðdraganda bankahrunsins kynnti störf sín, en svo sem kunnugt er var fráfarandi formaður Öldungadeildarinnar formaður úttektarnefndarinnar. Að loknum aðalfundarstörfum á þessum fundi mun svo Helga Bragadóttir arkitekt halda erindi um skipulag Landspítala - Háskólasjúkrahúss en hún heldur utan um skipulag nýju sjúkrahúsbygginganna á vegum samstarfsverkefnisins Spítals.
Í mars heimsótti Öldungadeildin Þjóðleikhúsið en Ingimundur Sigfússon er formaður Þjóðleikhúsráðs um þessar mundir. Þjóðleikhússtjóri Tinna Gunnlaugsdóttir og skrifstofustjórinn Ari Matthíasson tóku á móti okkur og sýndu húsið og aðstöðu baksviðs. Að því loknu var boðið upp á hressingu og Martha Norðdal lýsti fyrir okkur leikriti sínu Sjöundá sem við síðan sáum í Kúlunni. Allt var þetta með miklum ágætum og hefur verið gerður góður rómur af þessari för. Helst að einhverjum úr hópnum hafi þótt baðstofulífið á Sjöunda helst til krassandi.
Svo sem áður hefur Öldungadeildin aðstöðu hjá Lögfræðingafélaginu og nýtur frábærar aðstoðar Eyrúnar framkvæmdastjóra sem rétt er að þakka.
F.h. stjórnar
Hrafn Bragason
Skýrsla stjórnar öldungadeildar Lögfræðingafélagsins um starfsárið 2010-2011
Þetta telst vera þriðja starfsár deildarinnar. Frá aðalfundi í apríl 2010 hefur deildin skipulagt tveggja daga ferð í Húnaþing. Ferðin var farin 22.-23. maí. Þátttaka góð og heppnaðist ferðin vel í alla staði. Farið var fyrri daginn fyrir Vatnsnes undir fararstjórn Eyrúnar framkvæmdastjóra og Illugastaðir heimsóttir en þar urðu þeir örlagaríku atburðir sem leiddu til síðustu aftöku á Íslandi. Síðari daginn var fyrst farið á aftökustaðinn að Þrístöpum og síðan ekinn hringur í Vatnsdal. Eftir það heimsóttum við Þingeyrar þar sem Ingimundur Sigfússon og kona hans, eigandur staðarins, tóku á móti okkur með miklum höfðingsbrag. Að góðri dvöl liðinni á Þingeyrum var ekið til Reykjavíkur.
Fundir öldungadeildar
Fyrir jól voru haldnir tveir umræðufundir. Á hinum fyrri fjallaði Guðrún Pétursdóttir, formaður stjórnlaganefndar um stjórnlagaþing og þá undirbúningsvinnu sem leysa þurfti af hendi fyrir það. Fjörugar umræður urðu að loknu erindi Guðrúnar en enginn sá fyrir í þau vandræði sem stjórnlagaþingið átti eftir að rata. Í nóvember ræddu Brynjar Níelsson, formaður Lögmannafélagsins og Hildur Friðleifsdóttir, útibússtjóri Landsbankans í Austurstræti, um skuldaaðlögun heimila og fyrirtækja og þau úrræði sem í boði væru. Nú í lok janúar höfðu þeir Styrmir Gunnarsson og Ellert B. Schram, fyrrum ritsjórar framsögu um efnið: Staða íslenskra fjölmiðla. Þeir voru á einu máli um að fjölmiðlafrumvarp það, sem nú liggur fyrir Alþingi, leysti ekki þau vandamál sem uppi væru í fjölmiðlun á Íslandi. Við umræður í kjölfarið kom í ljós að flestir eða allir voru á því máli. Í febrúar flutti Valtýr Sigurðsson, ríkissaksóknari svo framsögu um Ríkissaksóknaraembættið og framtíð þess í tilefni þess að hann var að láta af störfum. Þann 16. mars s.l. bauð LOGOS lögmannsþjónusta svo öldungadeildinni í heimsókn í aðalstöðvar sínar til að kynnast fyrirtækinu og starfsemi þess. Gunnar Sturluson, hrl. og faglegur framkvæmdastjóri, kynnti fyrirtækið en síðan tóku þeir einnig til máls Pétur Guðmundarson hrl. og Jakob R. Möller hrl. Deildin kann öllu framangreindu fólki bestu þakkir fyrir liðsinnið. Fundargerðir vegna þessara funda hafa verið settar á netið og geta menn kynnt sér fundina þar nánar.
Stjórn
Þett síðasta starfsár hafa Auður Þorbergsdóttir, Hrafn Bragason og Jón Thors skipað aðalstjórn deildarinnar og Elín Norðdal, Jakob R. Möller og Guðrún Erlendsdóttir verið í varastjórn. Vegna samþykkta deildarinnar um stjórnarkjör halda Hrafn og Guðrún áfram næsta starfsár. Auður, Jón, Elín og Jakob hafa lokið sínum kjörtíma og samkvæmt samþykktunum eru þau ekki til endurkjörs. Ber því að kjósa tvo nýja aðalstjórnarmenn og tvo varastjórnarmenn til tveggja ára.
Öldungaráð
Öldungaráð hafa þau skipað Björn Friðfinnsson, Guðný Björnsdóttir, Hörður Einarsson, Ingimundur Sigfússon, Kristín Briem og Þór Vilhjálmsson og Reinhold Kristjánsson til vara. Það er kosið til eins árs í senn. Þar sem þau hafa aðeins gengt störfum í eitt ár má kjósa þau að nýju gefi þau kost á sér hafi þau ekki verið kjörin til annarra starfa fyrir deildina.
Í lokin
Formaður, sem sér nú á bak samstjórnendum sínum, kann þeim bestu þakkir, sem og öðrum trúnaðarmönnum deildarinnar og Eyrúnu framkvædastjóra. Það er álit stjórnarinnar að flest það sem við og öldungaráðið höfum bryddað upp á hafi tekist vel. Fundarformið sem við höfum komið okkur upp gefst vel, stutt erindi eða frásagnir og síðan afslappaðar og fremur jákvæðar umræður. Ágætt er þó að fá tillögur um fleiri fundarefni og fara má í fleiri ferðir og heimsóknir.
Hrafn Bragason
Skýrsla stjórnar öldungadeildar Lögfræðingafélags Íslands starfsárið 2009-2010
Þetta telst vera annað starfsár deildarinnar. Hið fyrsta varð nokkuð langt þar sem laga varð það að starfsári lögfræðingafélagsins sjálfs og svo mátti segja að starfsemin það ár væri nokkuð gerð í tilraunaskyni. Frá aðalfundi í apríl 2009 hefur deildin skipulagt ferð til Borgarness þar sem hlýtt var á Einar Kárason, rithöfund fjalla um efni bóka sinna sem byggðar eru á Sturlungu. Ferðin var farin 17. maí, var þátttaka góð og heppnaðist hún vel í alla staði. Fyrir jól voru haldnir þrír umræðufundir sem allir þóttu takast vel. Á hinum fyrsta fjallaði Páll Winkel, fangelsismálastjóri um sinn málaflokk og er ekki öfundsverður af því enda skortir fé og aðstöðu. Í byrjun nóvember sagði Baldvin Björn Haraldsson lögmaður okkur frá málsókn sinni vegna erlendra kröfuhafa á hendur íslenska ríkinu vegna neyðarlaganna en Arnar Þór Jónsson, lögmaður var fenginn til að bregðast við frásögninni. Í lok nóvember kom Ragna Árnadóttir, dómsmálaráðherra í heimsókn og ræddi um sinn málaflokk og það sem helst væri þar á döfinni. Stjórnin hafði fengið Helga I. Jónsson, dómstjóra og formann Lögfræðingafélags Íslands og Valtý Sigurðsson ríkissaksóknara til að taka þátt í umræðum sem urðu hinar fjörlegustu. Í janúar flutti Ragnhildur Helgadóttir prófessor við lagadeild Háskólans í Reykjavík erindi um fullveldishugtakið og í febrúar sögðu þeir Ólafur Þór Hauksson, sérstakur saksóknari og Sigurður Tómas Magnússon, prófessor við lagadeild Háskólans í Reykjavík okkur frá starfsemi sérstaks saksóknara vegna bankahrunsins. Deildin kann öllu fólki bestu þakkir fyrir liðsinnið. Fundargerðir vegna þessara funda hafa verið settar á heimasíðu Lögfræðingafélagsins og geta menn kynnt sér fundina þar nánar.
Þett síðasta starfsár hafa Auður Þorbergsdóttir, Hrafn Bragason og Jón Thors skipað aðalstjórn deildarinnar og Elín Norðdal, Jakob R. Möller og Sveinbjörn Hafliðsson verið í varastjórn. Vegna reglna deildarinnar um stjórnarkjör halda Auður, Jón, Elín og Jakob áfram næsta starfsár en Hrafn og Sveinbjörn hafa lokið sínum kjörtíma. Sveinbjörn hyggst taka sér frí í bili en Hrafn gefur kost á sér til endurkjörs næstu tvö ár en þá ber honum að taka sér að minnsta kosti frí. Auk varastjórnarmanna hafa þau Guðrún Erlendsdóttir, Ólafur W. Stefánsson og Ragnhildur Helgadóttir skipað öldungaráð. Öldungaráðið er kosið til eins árs í senn. Þar sem þau hafa gengt störfum í tvö ár ber þeim að taka sér frí samkvæmt samþykktum. Aðalstjórnin kann öldungaráðinu bestu þakkir. Í öldungaráðinu eiga í raun að sitja sex menn og er það nú tillaga stjórnar að þar sem segja að tilraunatíma deildarinnar sé lokið að við kjósum fulla tölu í ráðið til næsta starfsárs.
Það er álit stjórnarinnar að flest það sem við og öldungaráðið höfum bryddað upp á hafi tekist vel. Umræður hafa að vísu nokkuð mikið snúist um hrun bankanna og mun sjálfsagt gera það áfram en það er í raun að vonum. Fundarformið sem við höfum komið okkur upp gefst vel, stutt erindi eða frásagnir og síðan afslappaðar og fremur jákvæðar umræður. Ágætt er þó að fá tillögur um fleiri fundarefni og fara má í fleiri ferðir og heimsóknir.
Stjórnin
Skýrsla stjórnar öldungadeildar Lögfræðingafélags Íslands 2008-2009
Öldungadeild Lögfræðingafélags Íslands var stofnuð 28. nóvember 2007. Félagar, sem nú eru um 50 talsins, eru einnig félagar í Lögfræðingafélaginu sem sér um fjármál og rekstur að öðru leyti en því sem stjórn hennar hefur á sinni könnu.
Þetta fyrsta starfsár deildarinnar er orðið nokkuð langt sem stafar af því að aðalfund á að halda mánuðinn fyrir aðalfund Lögfræðingafélagsins en hann mun áætlaður í maí.
Um stjórnina
Í stjórn hafa setið Hrafn Bragason, kosinn til tveggja starfsára, Auður Þorbergsdóttir og Jón Thors, kosin til eins starfsárs. Í varastjórn Sveinbjörn Hafliðason, kosinn til tveggja ára, Elín Norðdahl og Jakob R. Möller kosin til eins árs. Þá starfar í félaginu öldungaráð, sem í sitja auk varastjórnarmanna, Guðrún Erlendsdóttir, Ólafur Walter Stefánsson og Ragnhildur Helgadóttir, kosin til eins starfsárs. Hefur öldungaráðið tekið þátt í umræðum og tillögum um starfstilhögun.
Starfsemi ársins
Öldungadeildin hefur á starfsárinu haldið umræðufundi, efnt vorferðar og haustferðar. Á stofnfundinum hafði Þorsteinn Pálsson ritstjóri framsögu um störf stjórnarskrárnefndar. Í janúar 2008 ræddi Stefán Eiríksson lögreglustjóri um skiptingu landsins í lögregluumdæmi. Í febrúar kom svo Sif Guðjónsdóttir skrifstofustjóri og talaði um þjóðlendumál. Í mars efndi deildin til leikhúsferðar og sá leikritið Brák í Landnámssetrinu í Borgarnesi. Á vorfundi kynnti síðan Jónas Fr. Jónsson, þáverandi forstjóri Fjármálaeftirlitsins starfsemi þess. Þá efndi deildin til haustferðar á slóðir Magnúsar Stephensen háyfirdómara undir fararstjórn stjórnar en Sigurður Líndal og Þór Vilhjálmsson sáu um fróðleik. Í þeirri ferð var Háskólinn á Bifröst heimsóttur og tók Bryndís Hlöðversdóttir, deildarforseti lagadeildar, á móti ferðalöngum og kynnti starfsemina. Í vetrarbyrjun var Hellisheiðarvikjun skoðuð undir leiðsögn Hjörleifs Kvaran, forstjóra Orkuveitu Reykjavíkur, sem kynnti lagaheimildir þær sem fyrirtækið starfar undir og bauð upp á veitingar. Eftir áramót hafa verið tveir fræðafundir. Í janúar fræddi Haukur Guðmundsson, settur forstjóri Útlendingaeftirlitsins, fundarmenn um starfsemi þess og í febrúar hafði Lárentsínus Kristjánsson, hrl. og skilanefndarmaður, framsögu um starfsemi skilanefnda bankanna.
Stjórnin kann öllu framangreindu fólki bestu þakkir fyrir liðsinnið og ennfremur miklu fleirum sem komið hafa á fundina og brugðist hafa við ræðum framsögumanna. Segja má að þetta fyrsta starfsár hafi að einhverju leyti verið í tilraunaskyni því ekki var vitað hvernig til mundi takast um starfrækslu deildarinnar. Stjórnin er a.m.k. ánægð með árangurinn og hyggst halda áfram á líkri braut en allar tillögur og ábendingar um starfsemina eru mjög vel þegnar.
Stjórnin.
Auglýsingar
Auglýsingar
Leit
Stjórnborð
Stjórnborð
